Garberak kirol materialaren bilketa solidarioa bultzatu du Saharako kanpamentuetako haur eta gazteei laguntzeko

SAGUIA Elkarteak sustatu duen eta Gipuzkoako Foru Aldundiaren eta SEADen Lagunen Elkartearen babesa duen ekimenak 200 haur eta gazte errefuxiatu baino gehiagori lagunduko die

Ekainean zehar, saharar errefuxiatuen kanpamentuetarako kirol materiala biltzeko gune bihurtuko da Garbera, SAGUIA Elkartearekin eta Gipuzkoako Foru Aldundiaren eta SEADen Lagunen Elkartearen babesarekin bultzatutako ekimen solidarioari esker.

Kanpainak ekipamenduak, baloiak eta beste kirol-material batzuk ematera gonbidatzen ditu herritarrak, gero kanpamentuetara bidaltzeko, SAGUIA Elkartea gauzatzen ari den kirol-, hezkuntza- eta komunitate-programak indartzeko. Erakundea 2019an sortu zen, eta gaur egun 200 haur eta gazterekin baino gehiagorekin egiten du lan, kirolarekin, hezkuntzarekin, osasunarekin, ingurumenarekin eta aisialdiarekin erlazionatutako ekimenen bidez.

Kanpainaren aurkezpenean Salec Hosien SAGUIAko ordezkariak gogorarazi duenez, “kirola jarduera fisikoa baino askoz gehiago da. Hezkuntza, bizikidetza, osasuna eta itxaropena da. Laguntza horri esker, haur eta gazteei espazio seguruak eskaintzen dizkieten eta kanpamentuetako komunitatea indartzen laguntzen duten proiektuak gauzatzen jarraitu ahal izango dugu”, berretsi du.

Bestalde, Nuria Vegas gure Garberako gerenteak nabarmendu duenez, “ekimen honek ezin hobeto adierazten ditu zentroak bultzatu nahi dituen balioak: komunitatea, elkartasuna eta pertsonekiko konpromisoa”. Gainera, kanpaina solidarioarekin bat egin dute Real Sociedad de Fútbol Fundazioak, Donostiako Real Cub de Tenisek, Fortuna Kirol Klubak, Martutenek, Luberri Kirolak, Sanlo Elgoibarreko Eskubaloi Elkarteak, IDK Euskotren Club Deportibo Ibaetak eta Easo Basketek.

Gipuzkoako Foru Aldundiak ere ekimenaren balioa bultzatu du, saharar kanpamentuetako haur eta gazteekin elkartasun, lankidetza eta konpromisoaren adibide gisa. Ildo horretan, Zainketa eta Gizarte Politiketako diputatu Maite Peñak azpimarratu du ekimen honek Gipuzkoaren balio onenak islatzen dituela: elkartasuna, komunitatearekiko konpromisoa eta keinu txikien bidez aukera handiak sortzeko gaitasuna. Garberak erakutsitako inplikazioa nabarmendu du, bere espazioa eta baliabideak gizarte-kausa baten zerbitzura jartzeagatik, eta SAGUIA elkarteak saharar errefuxiatuen kanpalekuetan egiten duen lana ere goraipatu du, kirola hezkuntzarako, inklusiorako eta ongizaterako tresna gisa baliatuz. Era berean, gipuzkoarrei kanpainarekin bat egiteko deia egin die, eta gogorarazi du Gipuzkoak behin eta berriz erakusten duela eskuzabaltasunez eta auzolanaren bidez erantzuteko gaitasuna duela.

Bestalde, Goizane Alvarez Kultura eta Kirol diputatuak azpimarratu duenez, “kirola tresna indartsua da komunitatea, aukera berdintasuna eta itxaropena sortzeko. Baloi bat, ekipazio bat edo edozein kirol material haur eta gazte askok baldintza hobeetan jolastu, ikasi eta hazi ahal izateko aukera bihur daiteke”. Alvarezek herritarrak animatu ditu kanpainarekin bat egitera, eta nabarmendu du “Gipuzkoak berriz ere erakutsi duela, keinu zehatz eta hurbilekin, herri sahararrarekin duen konpromiso solidarioa”. 

Mikel Porto ekimenaren bultzatzaileetako batek azaldu duenez, “askotan, guk erabiltzen ez dugun arren beste pertsona batzuentzat oso erabilgarria izan daitekeen kirol materiala izaten dugu etxean. Helburua elkartasun hori bideratzea eta ehunka haurrek kirola egiten eta hezkuntza- eta komunitate-jardueretan parte hartzen jarraitu ahal izateko aukera bihurtzea da”. 

Azkenik, SEADeko Lagunen Elkarteko Maite Berzosak eskerrak eman dizkie parte hartu duten erakunde guztiei, eta kanpainarekin bat egitera animatu ditu herritarrak. Bilketa ekaina osoan zehar egingo da Garbera barruan, Aristocrazy-ren inguruan.

Non eman ahal izango duzu zure kirol materiala?

📅: 2026ko ekainaren 3tik 30era

📍: Garberako Harreran (P2 sarrera, Ogi Berri eta Starbucks-en artean)

⏰: 10etatik 22etara